جلدة حنفية (قصة قصيرة)

 

• تمهيد

"من الخطأ أن تكون الأمور الأكثر أهمية تحت رحمة الأمور الأقل أهمية"  .جوهان ولفجانج فون جوته

(المشهد الأول)

المكان/ المستشفى الجامعي بجمهورية (سيلستان) – استراحة الأطباء

يتسلم أحد الأطباء الجدد عمله بالمستشفى الجامعي كمدرس مساعد..... يرحب به زملاؤه..... يسلموه جدولا بالمهام الموكلة إليه خلال الشهر القادم..... ينظر الطبيب إلى الجدول ويقرأ بصوت عالي.....

- الطبيب : يوم السبت عيادة, يوم الأحد تدريس للطلبة, يوم الإثنين نوباتجي عناية, يوم الثلاثاء ..............(يتوقف عن الكلام ويحدق بالجدول برهة, ينظر إلى زملائه متسائلا): يوم الثلاثاء مرور حمامات..... يعني إيه!؟

- يرد أحد الأطباء : يعني سيادتك تيجي من بيتكم الصبح بدري, وتمرعلى الحمامات وتشوفها نظيفة ولا لأ, ولو محتاجه حاجه تعملها.

- الطبيب : إنتوا أكيد بتهزروا يا رجاله!

- يرد طبيب اخر : والله زي ما بيقولك كده, دي أوامر الإدارة الجديدة, المرور على الحمامات قبل العيانين.

- الطبيب (محاولا استيعاب الموقف) : يبقى أكيد الحمامات دي فخمة ومصروف عليها ملايين؟!

- أحد الأطباء : لأ أبدا دي متهالكة, ومحتاجه مش بس صيانه لا دي عايزة تتفور وتتبني من الاول.

- الطبيب : طيب وكلمتوا حد من القسم؟

- أحد الأطباء : كلمنا

- الطبيب : وقالوا إيه؟

يسود صمت مطبق

(المشهد الثاني)

المكان/ غرفة الطبيب بالقسم الداخلي..... يجلس الطبيب الجديد على كرسي المكتب..... يحاول تحضير الدرس الذي سيلقيه غدا على طلبته..... يرن جرس الهاتف..... يرد الطبيب

- الطبيب : ألو

- الطرف الاخر : أيوه يا دكتور, أنا ممرضة القسم, سرير رقم تلاته يا دكتور

- الطبيب (بلهفة) : ماله حصل له حاجه ولا إيه؟

- الممرضة : لأ ما تقلقش يا دكتور, بس المريض راح الحمام وعمل (بي بي) ومش عارف يشد السيفون.

- الطبيب : وأنا مالي بالموضوع ده؟

- الممرضة : معلش يا دكتور, بس أنا سمعت حد من الإدارة بيقول إن الحمامات مسؤولية الدكاتره.

- الطبيب (متمالكا أعصابه) : حاضر يا مس هاجي أشد له السيفون.

تمر دقائق..... يرن جرس الهاتف..... يرد الطبيب

- الطبيب : ألو

- الممرضة : يا دكتور سرير رقم أربعة بيقول إنه راح الحمام ولقي البلاعة مسدودة والحمام غرقان ميه.

- الطبيب : اللهم طولك يا روح, حاضر يا مس, هاجي أسلكها

تمر دقائق..... يرن جرس الهاتف...... يرد الطبيب

- الطبيب : ألو

- الممرضة : أيوه يا دكتور, عم محمد سرير رقم واحد.

- الطبيب : ماله, عمل (كاكا) وعايز حد يمسحها له؟!!

- الممرضة : لأ يا دكتور, بالعكس ده عنده إمساك وعايزك تكتب له على ملين

- الطبيب : ملين؟؟؟؟ (يصمت برهة مفكرا, ثم يكمل): راحت عن بالي فين الفكرة دي, هاتي لي كل التذاكر هنا في المكتب.

- الممرضة : ليه يا دكتور؟

- الطبيب : هنوقف كل الملينات ومدرات البول.

(المشهد الثالث)

المكان/ عنبر المرضى..... الطبيب الجديد يسلم أحوال النوباتجيه لزميله الاخر.

- الطبيب : بص يا سيدي, عندك عم محمد ده تشخيصه نزلة معوية, والست جملات دي عندها ارتفاع في وظائف الكلى, أما عم علي فالضغط على طول عالي........ وخد عندك كمان السيفون بتاع حمام خمسه مش شغال, والحنفية رقم تلاته بتنقط وعايزة تتربط كويس, وعندك في درج المكتب هتلاقي السماعة وجهاز الضغط ومفتاح عشرة, ومفك صليبه, ولي.

(المشهد الرابع)

.

المكان/ أحد المؤتمرات العلمية في أحد الفنادق الكبرى..... يجلس الأطباء من جميع أرجاء الجمهورية في مطعم الفندق..... في انتظار وجبة العشاء..... يجلس الطبيب الشاب على إحدى الطاولات مع بعض زملائه من شباب الأطباء..... يخرج أحد الأطباء مجموعة أوراق من حقيبته..... يتحدث إلى زملائه شاكيا.

- الزميل : تخيلوا المدير بتاعنا بيتدخل في أبحاثنا العلمية برغم إنها مش في تخصصه..... الورق ده فيه اخر بحث علمي عملته مع دكاتره من بره, المدير بيقول إن البحث مش عاجبه..... بس القسم عندنا رفض تدخله في البحث ووافق عليه زي ما هو.

يبتسم الطبيب الشاب ولا ينطق بكلمه

- زميل اخر : يا دكتور الحال من بعضه, إحنا عندنا المدير الجديد عايز يغير المنهج الدراسي..... (يخرج كشكولا من حقيبته, ثم يكمل) : الكشكول ده في محاضرات عملها أساتذتنا, بيقول إنها مش عاجباه وعايزنا نغيرها, بس القسم رفض طبعا.

يحاول الطبيب الشاب تغيير الموضوع..... يشير إلى النادل وكأنه يستعجل العشاء.

- يتحدث زميل ثالث : بصوا يا جماعة.... (يفتح جهاز الحاسوب المحمول, ثم يقول): ده إيميل اتبعت لي من بريطانيا علشان البعثه بتاعتي, المدير بتاعنا عايز يغير مكان البعثة ويخليها ألمانيا, بس أنا كلمت القسم عندنا وأصر إن البعثة تكون لبريطانيا.

ينظر الطبيب الشاب إلى الأرض..... يسأله أحد زملائه.

- الزميل : وانت يا دكتور, أخبارالدنيا عندك إيه؟

ينظر الطبيب إليهم..... يضع يده في جيبه..... يخرج (كيسا به عدد تلاته جلدة حنفية) ويضعه أمامهم على الطاولة..... ينظر الجميع إلى الكيس في استغراب..... يسود صمت مطبق.

عمرو أبوالحسن

ديسمبر ٢٠١٤