.jpeg)
- يغلق الولد كتاب التاريخ، يتوجه نحو والده، يسأله في براءة وحيرة: بابا...هي ليه مصر أم الدنيا؟
- يصمت الوالد برهة باحثا عن إجابة لسؤال لم يتوقعه أو ربما لم يسأله لنفسه من قبل ثم يرد في حزم: علشان الشعب المصري ده أعظم شعوب الأرض؟ ده شعب جبار؟
- الولد متحمسا: عمل إيه يعني؟
- الوالد: حاجات كتير....بنى الأهرامات مثلا اللي هي واحده من عجائب الدنيا السبع.
- الولد: طيب ما الصينين هما كمان بنوا سور الصين العظيم وواحد من عجائب الدنيا السبع بردو، يبقى الصين بردو أم الدنيا
- الوالد وهو يهرش شعر رأشه: لأ مش كده....فيه فرق كبير بنا وبنهم
- الولد: إيه هو؟!
- الوالد: يعني إحنا مثلا عندنا نهر النيل العظيم، وده نهر مش موجود في أي بلد تاني في العالم.
- الولد مستغربا: بس أستاذ الجغرافيا قلنا إن الصين بردو فيها أكتر من ١٥٠٠ نهر، وكمان نهر النيل بيعدي على السودان واثيوبيا وكينيا وأوغندا وبلاد تانيه قبل ما يوصلنا...وبعدين يعني هو المصريين هما اللي حفروا نهر النيل؟
- الوالد بحزم: لا طبعا
- الولد: طيب يبقى إيه علاقة إننا شعب عظيم ومصر أم الدنيا بالنيل؟
- الوالد محاولا الاستدراك للخروج من الموقف: بلاش النيل ياسيدي، إنت مش درست في التاريخ إن صلاح الدين الأيوبي هو اللي هزم الصليبيين؟ أهو علشان كده إحنا شعب جبار ومصر هي مقبرة الغزاة من زمان.
- يفتح الولد كتاب التاريخ ويقلب في صفحاته، ثم يتوقف عند إحدى الصفحات وينظر لوالده: بس هما كاتبين هنا إن صلاح الدين الأيوبي كان كردي مش مصري.
- الوالد مرتبكا: وريني كده......ينظر للكتاب في تمعن ثم يلتفت لولده: خلاص ياسيدي بلاش صلاح الدين، خليك في قطز اللي هزم المغول.
- الولد: بس قطز هو كمان مش مصري، ده كان مملوك...عبد يعني.
- الوالد منزعجا: يابني مصر دي مذكورة في القرآن، هنا اتولد سيدنا موسى وعاش سيدنا يوسف
- الولد: يعني قصدك تقول إنه علشان إحنا حبسنا سيدنا يوسف، وطاردنا سيدنا موسى، علشان كده إحنا شعب عظيم.
- الوالد وقد بدت عليه علامات الخجل، فيحاول الهروب من الموقف بدخوله على الانترنت وادعائه مساعدة ابنه في الوصول إلى إجابة لسؤاله: أهه يا سيدي هريحك خالص، هنكتب في محرك البحث تاريخ مصر...وبعدين ندوس بحث.
- الولد متلهفا لمعرفة النتيجة: إيه مكتوب؟
- الوالد يقرأ: هذا وقد احتلت مصر في العهد الفرعوني من فبل الساميين، ثم احتلها الهكسوس، وبعد ما غزا الاسكندر المقدوني مصر بدأ الاحتلال البطلمي اليوناني، تبعه الاحتلال الروماني البيزنطي، ثم احتلها الساسانيون، وبعد فتح عمرو بن العاص لمصر، حكمت مصر أسرة من طاجكستان ثم جاءت الدولة الفاطمية الشيعية، وبعد ذلك بأعوام حكم مصر المماليك، تبعه الحكم التركي العثماني ثم الاحتلال الفرنسي، ثم حكمت مصر أسرة محمد علي الألباني الأصل، وخلال حكم أسرته احتلت انجلترا مصر، ثم تمكن اليهود الصهاينة من احتلال فلسطين وسيناء المصرية.
- الولد متجهما: كل الشعوب دي احتلتنا وحكمتنا؟
- الوالد مصدوما: ألمفروض..النت بيقول كده
- الولد: دلوقتي بس عرفت ليه مصر أم الدنيا
دكتور عمرو أبوالحسن المنشد
تعليقات
إرسال تعليق