التخطي إلى المحتوى الرئيسي

الكورتيزون (مقال بالعامية)

 


"بس بلاش تكتب لي كورتيزون يا دكتور"

جملة بيرددها عدد كبير من المرضى بالرغم إن نسبة كبيرة منهم ما تعرفش هي إيه طبيعة الكورتيزون أو دوره وأهميته للجسم.

علشان كده هنجاوب في المنشور ده عن عدد من الأسئلة الشائعة عن الكورتيزون.


*إيه هو الكورتيزون؟

الكورتيزون هو هرمون من الهرمونات اللي بيفرزها الجسم بشكل طبيعي من غدة موجودة فوق الكلى اسمها (الغدة الكظرية)، بيزيد إفراز هرمون الكورتيزون في الصباح بعد الاستيقاظ من النوم وبيقل تدريجيا باقي اليوم.


* طيب بيعمل إيه هرمون الكورتيزون في الجسم؟

الكورتيزون هو الهرمون اللي بيساعد الجسم إنه يتعافى سريعا وإنه يعيد تصليح أنسجته التالفة أو الملتهبة في وقت قصير، علشان كده بيسميه العلماء هرمون الأوقات الصعبة، وده لأنه بيزود من نسبة الجلوكوز في الدم وده مهم علشان أعضاء الجسم المختلفة وأهمها المخ تحصل على الطاقة اللازمة علشان تقوم بوظيفتها بشكل كامل تحت الضغط والتوتر، كمان  الكورتيزون بيحافظ على ضغط دمك ويمنعه من الهبوط وبيتحكم في استجابة جهازك المناعي، وبيزود من المواد اللي بيحتاجها جسمك علشان يصلح الأنسجة في حال تعرضها للأذى أو التلف.


* طيب ليه الدكاترة بيكتبوا الكورتيزون؟

في بعض الأمراض جهاز المناعة بيبقى عامل زي الحصان أو الثور الهايج اللي بيخبط في كل اللي حواليه ومش بيفرق بين عدو وصاحب فبتكون النتيجة إن كل أنسجة الجسم تتضرر، في الحالات دي الجسم بيبقى محتاج لحد يسيطر على جهاز المناعة، والكورتيزون هو الشخص أو اللجام اللي بيقدر يكبح جماح الثور الهايج ده علشان ما يسببش أذى للجسم.


علشان كده الأطباء بيكتبوه في كتير من الأمراض اللي بيكون سببها النشاط الزايد والتصرف الخاطيء لجهاز المناعة واللي ممكن يسبب أذى والتهابات مزمنة في بعض أنسجة الجسم زي أمراض الحساسية المختلفة اللي بتصيب العين أو الأنف أو الجلد أو الشعب الهوائية وغيرها من أمراض الدم والتهاب القولون والأمعاء، وبالتالي هيقلل من الالتهابات في المناطق دي ويمنع المضاعفات اللي ممكن تحصل بسبب استمرار الالتهابات المزمنة.


 * بس أدوية الكورتيزون ليها أعراض جانبية كتير، فليه ناخدها؟

ادوية الكورتيزون زيها زي أي أدوية تانية استعمالها بجرعات عالية ولفترات طويلة دون استشارة الطبيب بتؤدي إلى مضاعفات ومشاكل يعني مثلا لو فضلت تاخد مسكنات لفترات طويلة فوظايف كليتك معرضة للتلف، إنما استعمال ادوية الكورتيزون عند الحاجة بحرعات بسيطة ولفترات قليلة لا يشكل أي ضرر على الجسم.


* طيب اشمعنى الكورتيزون اللي الناس بتخاف منه؟

ده راجع لبداية اكتشاف ادوية الكورتيزون سنة ١٩٤٨ لإن الناس في الفترة دي استعملته بكثرة وعلى نطاق واسع ولفترات طويلة وده خلى اعراضه الجانبية تظهر على كتير من اللي استعملوه بشكل غير طبي وغير محسوب وده اللي سبب الهلع والخوف منه.

وأدى في هؤلاء الأشخاص اللي استعملوه بشكل غير طبي في حدوث آثار جانبية زي اضطرابات المعدة وهشاشة العظام والمياه البيضاء وارتفاع نسبة السكر بالدم


والأدوية الحديثة ابتدت تتصمم بشكل يقلل من الأعراض دي بشكل كبير، والأشخاص اللي محتاجين مواد تقلل الالتهابات المزمنة عندهم لفترات طويلة اخترعوا لهم أدوية كورتيزون موضعية زي المراهم والبخاخات بحيث تؤدي مفعولها بسرعة وقوة وفي نفس الوقت من غير آثار جانبية خطيرة.


* ولو ما أخدتش دوا الكورتيزون إيه ممكن يحصل؟

للأسف في بعض الحالات ممكن يكون نتائج عدم تناول أدوية الكورتيزون كارثية فمثلا

كثير من النساء الحوامل المصابات بحساسية الأنف والصدر بيرفضوا  تناول الكورتيزون خوفا على الجنين من الضرر والتشوهات بسبب بعض المفاهيم الغلط وبتكون النتيجة معاناة الأم اثناء الحمل والولادة وأحياناً ممكن يموت الجنين لسبب نقص الأكسجين بسبب امتناع الأم عن تناول الدواء خوفاً على الجنين


مرضى تانين ممكن يدخلوا العناية المركزة نتيجة عدم التزامهم بأخذ بخاخات الكورتيزون مثلا بشكل منتظم وممكم لا قدر الله يوصل الأمر للوفاة.


 علشان كده بنقول إن الكورتيزون دوا زي أي دوا، يعتبر سلاح ذو حدين، هيدي نتايج سحرية لو اتاخد بتركيزات ومدد يحددها الطبيب و ممكن يؤدي إلى آثار جانبية مع الاستعمال المفرط غير المقيد.


د.  عمرو أبوالحسن المنشد

التسميات:

تعليقات

إرسال تعليق

المشاركات الشائعة من هذه المدونة

من مذكرات مدرس مساعد بطب أسوان (ج٢)

الجزء الثاني:  الرهان على الجدران استدعاه يوما أحد من أوسد إليهم الأمر إلى مكتبه، فلأشد ما كان استغراب الفتى ولأشد ما كانت حيرته، فما كان يوما طراقا لأبوابهم وما كان يوما ميمما وجهه شطرهم، وإنه ليفر منهم فرار السليم من الأجرب والحمر المستنفرة من القسورة، ذهب الفتى إلى مكتب المسؤول وما إن جلس إليه حتى ذهبت عنه حيرته وبادره المسؤول يجادله في بضع أسطر ناقدات خطهن الفتى بيده، فما كان ذلك المسؤول في قوله حليما وما كان في فعله أواها منيبا، لكنه فكر وقدر ثم نظر ثم عبس وبسر ثم أدبر واستكبر فقال للفتى: إن هذا إلا حقد البشر، أكنت في هذه أعمى فلم تر إلا سوادا وظلمة؟،أأنكرت عيناك هذه الإنجازات من رمد أم أنكر فمك طعمها من سقم؟، فما كان من الفتى إلا أن ساق إليه حجته وعرض عليه وجهته، لكن المسؤول كان عن أفكار الفتى بعيدا وكان لحججه عنيدا. خرج الفتى وقد أخذه من ذلك المسؤول العجب كل العجب، غاية العجب، بالغ ما شئت في العجب، كيف يكون ابتلاعك لهمك وموتك به أهون عند أحدهم من أن تنقده أو أن تواجهه بسلبيات إدارته!؟، وهل كانت غاية الفتى في أمره كله سوى الإصلاح ما استطاع، فهو ما رأى منكرا إلا وحاول أن يغيره...
إرسال تعليق
قراءة المزيد

المشهد كما أراه (خاطرة)

بلا طعم بلا لون بلا رائحة تأتي كلماته. نفس مريضة تبحث عن مجدها المزعوم  في صناديق القمامة ... ومصارف المياه. إسقاط ... ثم تعويض ... فإنكار ... صبغت جميعها بضلالات العظمة ... وجنون الإلهام. إفلاس يدعي الغنى ... وقبح يدعي الجمال ... و بلاهة تدعي التعقل ... ظلمات بعضها فوق بعض. وهم يتحدث عن أوهام ... يلقي بها إلى ثلة من الانتهازيين  الأغبياء. اللا إنسانيين ... واللا بهيميين ... خائفين ... مخوفين ... ضالين ... مضلين ... للقيم قالبين ... للحقائق مزييفين. . الشمس عندهم قد تشرق من مغربها والأرض عندهم قد لا تدور ومحاكم التفتيش جاهزة إن أنت أنكرت  أو قدرت أو فكرت أو حاولت أن تقول. عمرو أبوالحسن أكتوبر ٢٠١٦
إرسال تعليق
قراءة المزيد

كل شيء بقدر (مقال ديني)

  رحم الله نبي الله موسى، لم يعنف فتاه حين نسي أمر الحوت و جاوزا الصخرة، و لم يلم حظه أو ينعته بالسيء لأنه لم يقف عند المكان المراد مبكرا بل جاوزه لما بعده حتى أصابه التعب و النصب. فاعلم يرحمك الله أنك قد تسعى نحو هدفك تروم بلوغه في وقت محدد، لكن الله تعالى يجعل الخير كل الخير في أن تصل إليه متأخرا و قد أصابتك بعض المشقة.
إرسال تعليق
قراءة المزيد